ഇന്നുമെന്റെ കണ്ണുനീരില്‍

ഇന്നുമെന്റെ കണ്ണുനീരില്‍ നിന്നോര്‍മ പുംചിരിച്ചു
ഈറന്‍ മുകില്‍മാലകളില്‍ ഇന്ദ്രധനുസ്സെന്നപോലേ..

സ്വര്‍ണമല്ലി നൃത്തമാടും നാളെയുമീ പൂവനത്തില്‍
തെന്നല്‍ കൈ ചേര്‍ത്തുവെക്കും പൂക്കൂന പൊന്‍പണം പോല്‍..
നിന്‍ പ്രണയപ്പൂ കനിഞ്ഞ പൂമ്പൊടികള്‍ ചിറകിലേന്തി..
എന്റെ ഗാനപ്പൂത്തുമ്പികള്‍ നിന്നധരം തേടി വരും

ഇന്നുമെന്റെ കണ്ണുനീരില്‍ നിന്നോര്‍മ പുംചിരിച്ചു
ഈറന്‍ മുകില്‍മാലകളില്‍ ഇന്ദ്രധനുസ്സെന്നപോലേ..

ഈ വഴിയില്‍ ഇഴകള്‍ നെയ്യും സാന്ധ്യനിലാശോഭകളില്‍
ഞാലിപ്പൂവന്‍ വാഴപ്പൂക്കള്‍ തേന്‍പാളിയുയര്‍ത്തിടുമ്പോള്‍
നീയരികില്‍ ഇല്ലയെങ്കില്‍ എന്തു നിന്റെ നിശ്വാസങ്ങള്‍
രാഗമാലയാക്കി വരും കാറ്റെന്നെ തഴുകുമല്ലോ

ഇന്നുമെന്റെ കണ്ണുനീരില്‍ നിന്നോര്‍മ പുംചിരിച്ചു
ഈറന്‍ മുകില്‍മാലകളില്‍ ഇന്ദ്രധനുസ്സെന്നപോലേ..

ഇന്നുമെന്റെ കണ്ണുനീരില്‍ നിന്നോര്‍മ പുംചിരിച്ചു

:=====:
സംഗീതം: രവീന്ദ്രന്‍ മാഷ്
ചിത്രം: യുവജനോല്‍സവം
പാടിയത്: യേശുദാസ്
എഴുതിയത്: സത്യന്‍ അന്തിക്കാട്  (ഞെട്ടിച്ചു കളഞ്ഞു!)

നിന്‍ മധുരമാം കാലൊച്ച!

വാതില്‍പ്പഴുതിലൂടെന്‍ മുന്നില്‍ കുങ്കുമം
വാരിവിതറും തൃസന്ധ്യ പോകേ..
അതിലോലമെന്‍ ഇടനാഴിയില്‍ നിന്‍ കളമധുരമാം കാലൊച്ച കേട്ടൂ..
മധുരമാം കാലൊച്ച കേട്ടു..

ഹൃദയത്തിന്‍ തന്തിയിലാരോ വിരല്‍ തൊടും
മൃദുലമാം നിസ്വനം പോലേ..
ഇലകളില്‍ ജലകണം ഇറ്റുവീഴുംപോലെന്‍
ഉയിരില്‍ അമൃതം തളിച്ച പോലേ..
തരള വിലോലം നിന്‍ കാലൊച്ച കേട്ടു ഞാന്‍
അറിയാതെ കോരിത്തരിച്ചു പോയി..
അറിയാതെ കോരിത്തരിച്ചു പോയി

ഹിമബിന്ദു മുഖപടം ചാര്‍ത്തിയ പൂവിനെ
മധുകരം നുകരാതെയുഴറും പോലേ
അരിയ നിന്‍ കാലൊച്ച ചൊല്ലിയ മന്ത്രത്തിന്‍
പൊരുളറിയാതെ ഞാന്‍ നിന്നു
നിഴലുകള്‍ കളമെഴുതുന്നൊരെന്‍ മുന്നില്‍
മറ്റൊരു സന്ധ്യയായ് നീ വന്നു
മറ്റൊരു സന്ധ്യയായ് നീ വന്നു

------------------------------------
"ഇടനാഴിയില്‍ ഒരു കാലൊച്ച" എന്ന ചിത്രത്തില്‍ നിന്നു.
ദക്ഷിണാമൂര്‍ത്തി സ്വാമി | യേശുദാസ്‌ | ഓ എന്‍ വി കുറുപ്പ്